ایران کی وزارت خارجہ کے ترجمان نے پاکستان کے شہروں اورماڑا، کوئٹہ اور شمالی وزیرستان میں دھشتگردانہ حملوں کی مذمت کرتے ہوئے پاکستانی حکومت اور عوام بالخصوص لواحقین سے ہمدردی کا اظہار کیا ہے۔
اسلامی جمھوریہ ایران کی وزارت خارجہ کے ترجمان سعید خطیب زادہ نے گزشتہ دو روز کے دوران اورماڑا، کوئٹہ اور شمالی وزیرستان میں پاکستانی فوجیوں پر دھشت گردانہ حملوں کی مذمت کرتے ہوئے حکومت پاکستان اور عوام سے اظہار تعزیت کیا۔
ایران کی وزارت خارجہ کے ترجمان نے ہر طرح کی دھشت گردی کو مسترد کرتے ہوئے دھشت گردانہ کارروائیوں کے مرتکبین، منتظمین، معاونین، سرپرستوں اور سہولت کاروں کے خلاف جاری لڑائی میں خطے کے تمام ممالک کی شراکت کی ضرورت پر زور دیا۔
واضح رہے کہ کل کوسٹل ہائی وے پر اورماڑا کے قریب سکیورٹی فورسز اور دھشتگردوں کے درمیان مقابلے میں سات ایف سی اہلکار اور قافلے کے سات گارڈ جاں بحق ہو گئے جبکہ دھشتگردی کا ایک اور واقعہ شمالی وزیرستان کے علاقے رزمک میں پیش آیا جہاں بارودی سرنگ کے دھماکے میں 6 فوجی اہلکار جاں بحق ہوئے۔

Add comment