ایران کی وزارت خارجہ کے ترجمان نے عالمی برادری سے مطالبہ کیا ہے کہ وہ تکفیری ٹولے داعش کے نظریاتی پھیلاؤ اور اس کے دوبارہ مضبوط ہونے کے سلسلے میں ہوشیار رہے۔
ایران کی وزارت خارجہ کے ترجمان سعید خطیب زادہ نے داعش دھشتگرد گروہ کے مقابلے میں عراقی قوم و حکومت کی فتح کی تیسری سالگرہ کی مبارک باد دیتے ہوئے کہا کہ یہ فتح و کامیابی وسیع دھشتگردی کے خلاف آیت اللہ العظمی سیستانی کی ہدایات اور عراقی قوم و حکومت اور اس ملک کی سیکورٹی فورسز کے عزمِ محکم اور جدوجہد کا نتیجہ ہے۔
انہوں نے کہا کہ ایران کی قوم اور حکومت ہمیشہ عراقی قوم و حکومت کا ساتھ دیتی رہی ہے اور وہ عراق کے اتحاد، امن و سیکورٹی، استحکام و پائداری اور پیشرفت و ترقی کے لئے کسی بھی طرح کی مدد سے دریغ نہیں کرے گی۔
ایران کی وزارت خارجہ کے ترجمان سعید خطیب زادہ نے زور دے کر کہا کہ ہم نے دیکھا ہے کہ ایران و عراق کے شھیدوں نے ایک دوسرے کے ساتھ مل کر کس طرح اس مقدس جہاد میں اپنا خون بہایا اور دھشتگردی و انتہا پسندی کے خلاف جنگ کے سردار کی حیثیت سے شھید قاسم سلیمانی اور شھید ابو مہدی المھندس کے قتل کے سانحے میں دونوں ملکوں کی حکومتوں کی یکجہتی و ہمدلی اپنے عروج پر پہنچ گئی۔
سعید خطیب زادہ نے کہا کہ اگرچہ داعش کی فوجی طاقت شکست سے دوچار ہو گئی لیکن تکفیری نظریات، انسانیت دشمنی اور دھشتگردانہ افکار اور علاقے اور علاقے سے باہر اس کی خفیہ اور اعلانیہ حمایتوں کا سلسلہ جاری ہے اور عالمی برادری کے لئے لازم ہے کہ وہ داعش کے نظریاتی پھیلاؤ اور اس کے دوبارہ مضبوط ہونے کی بابت ہوشیار رہے۔

Add comment