اسلامی جمھوریہ ایران کے صدر ڈاکٹر حسن روحانی نے اقوام متحدہ کی جنرل اسمبلی کے نام ایک پیغام میں عالمی برادری سے بچوں کی قاتل صھیونی حکومت سے مقابلے کے لیے اٹھ کھڑے ہونے کی اپیل کی ہے۔
فلسطینی عوام سے یکجہتی کے عالمی دن کی مناسبت سے نیویارک میں اقوام متحدہ کے رکن ملکوں کے نمائندوں کی شرکت سے منگل کے روز ایک پروگرام منعقد ہوا۔
ڈاکٹر حسن روحانی نے اقوام متحدہ کی جنرل اسمبلی کے نام ایک پیغام میں کہا ہے کہ انتیس نومبر کی تاریخ، غاصب صھیونی حکومت کے ہاتھوں فلسطینی سرزمین پر سات عشرے سے زیادہ غاصبانہ قبضے، فلسطینی عوام کے ختم نہ ہونے والے مصائب و آلام اور ان کے ساتھ کیے جانے والے ظلم و ناانصافی کی یاد دلاتی ہے۔
انھوں نے کہا ہے کہ روز بروز صھیونی حکومت کی جارحانہ اور نسل پرستانہ پالیسیوں نیز جرائم میں اضافہ ہوتا جا رہا ہے۔
صدر مملکت نے کہا ہے کہ صھیونی حکومت کے غاصبانہ اور جارحانہ اقدامات سے نہ صرف یہ کہ مقبوضہ علاقوں کے حالات بدتر ہوں گے بلکہ ان سے علاقائی اور عالمی سطح پر سیکورٹی کے بہت زیادہ منفی نتائج بھی برآمد ہوں گے۔
ڈاکٹر حسن روحانی نے کہا کہ اسلامی جمھوریہ ایران، فلسطینی عوام اور صھیونی حکومت کی جارحیت اور قبضہ کرنے کی پالیسی کے خلاف ان کی قانونی استقامت کی ہمہ گير حمایت جاری رکھنے پر زور دیتا ہے اور عالمی برادری سے اپیل کرتا ہے کہ وہ بچوں کی قاتل، انسانی حقوق کو پامال کرنے والی اور اقوام متحدہ کی متعدد قراردادوں کی خلاف ورزی کرنے والی صھیونی حکومت کے اقدامات کے خلاف اٹھ کھڑی ہو۔

Add comment