ایران کے سینئر ایٹمی سائنسداں محسن فخری زادہ کے قتل کے بعد وسیع پیمانے پر رد عمل سامنے آ رہے ہیں۔
ایران کے سینئر ایٹمی سائنسداں محسن فخری زادہ کو دار الحکومت تہران کے نزدیک آبسرد نواحی علاقے کے ایک چوراہے پر خودکش حملے میں شھید کر دیا گیا۔
یہ حملہ جمعے کو دو پہر 2 بج کر 40 منٹ پر کیا گیا۔ تفصیلات کے مطابق پہلے ان کی گاڑی پر ایک دھشت گرد نے فائرنگ کی اس کے بعد ایک وانٹ میں سوار خودکش حملہ آور نے دھماکہ خیز مواد سے بھری گاڑی کو دھماکے سے اڑا دیا۔ اس کے بعد نزدیک موجود اس کے دھشت گرد ساتھیوں نے محسن فخری زادہ کی گاڑی پر فائرنگ شروع کر دی۔ اس حملے کے بعد محسن فخری زادہ کے ساتھ ان کے کچھ رشتہ دار اور سیکورٹی گارڈز بھی بری طرح زخمی ہوئے۔ حملے میں ان کا ایک باڈی گارڈ بھی شھید ہو گیا۔
حملے کے بعد ایران کے ایٹمی سائنسداں محسن فخری زادے کو ھیلی کاپٹر کے ذریعے اسپتال پہنچايا گیا تاہم ڈاکٹرز انہيں بچانے میں کامیاب نہ ہو سکے اور وہ شھید ہوگئے۔
اس موقع پر ہونے والی جھڑپوں میں کئی لوگ ہلاک ہوئے جن کی شناخت ابھی تک واضح نہیں کی گئی ہے تاھم کچھ ذرائع کے مطابق ہلاک ہونے والوں میں کئی حملہ آور بھی شامل ہیں۔
ایران کی وزارت دفاع نے ایک بیان جاری کرکے واقعے کی اطلاع دیتے ہوئے بتایا کہ حملے کے بعد زخمی حالت میں محسن فخری زادہ کو اسپتال لے جایا گیا لیکن ان کو زندہ رکھنے کی ڈاکٹروں کی کوشش کامیاب نہیں ہو سکی اور ایران کے ایک اور عظیم خادم کی برسوں تک اپنے ملک اور قوم کی خدمت کے بعد شھادت واقع ہوگئی۔
ایران کے وزیر خارجہ جواد ظریف نے ٹوئٹ کرکے کہا کہ شھید فخری زادہ کے قتل میں اسرائیل کے ملوث ہونے کے اشارے ملے ہیں۔
انھوں نے لکھا کہ دھشت گردوں نے ایران کے ایک اور سینئر سائنسداں کو قتل کر دیا۔ یہ بزدلانہ اقدام جس میں اسرائیل کے ملوث ہونے کے اشارے ملے ہیں، ناکامی کے بعد جنگ کی کوشش کی علامت ہے۔
انھوں نے لکھا کہ ایران عالمی برادری خاص طور پر یورپی یونین سے مطالبہ کرتا ہے کہ وہ اپنے توہین آمیز دوغلے رویے کو ختم کرے اور اس دھشت گردانہ حملے کی مذمت کرے۔
اسلامی جمھوریہ ایران کی مسلح فوج کے چیف آف اسٹاف جنرل محمد باقری نے ایک بیان جاری کرکے فخری زادے کی شہادت پر تعزیت پیش کرتے ہوئے کہا کہ عالمی استعمار اور صھیونیزم سے متعلق دھشت گردوں نے وحشیانہ حملہ کرکے ملک کے ایک بڑے محقق اور سائنسداں کو قتل کردیا۔
انھوں نے اپنے بیان میں کہا کہ وزارت دفاع کے تحقیقاتی شعبے کے سربراہ شھید ڈاکٹر محسن فخری زادہ نے زندگی بھر ملک کی بہت زیادہ خدمت کی اور وہ ملک کی دفاعی توانائی کو ایک قابل قبول حد تک پہنچانے میں کامیاب رہے اور اتنے بڑے سائنسداں کا قتل ملک کی دفاعی توانائی پر گہری چوٹ ہے لیکن دشمن یہ جان لیں کہ شھید فخری زادہ نے جو راستہ بنایا ہے وہ جاری رہے گا اور یہ کاروائی کرنے والے دھشت گرد اور ان کے حامی اور احکامات صادر کرنے والے یہ جان لیں کہ سخت بدلہ لیا جائے گا۔
سپاہ پاسداران انقلاب اسلامی فورس کے کمانڈر جنرل سلامی نے بھی ٹوئٹ کیا کہ ایٹمی سائنسداں کا قتل، ہمیں پیشرفتہ سائنس تک پہنچنے سے روکنے کے لئے تسلط پسندوں کی جانب سے پر تشدد اور واضح تصادم کی ایک شکل ہے۔
رھبر انقلاب اسلامی کے مشیر اور ایران کے سابق وزیر دفاع جنرل حسین دھقان نے کہا ہے کہ ہم شھید فخری زادے کے قاتلوں پر بجلی بن کر ٹوٹ پڑیں گے۔
انھوں نے ٹوئٹ کیا کہ صھیونی، اپنے جواری دوست کے اقتدار کے آخری دنوں میں ایک جنگ شروع کرنے کے لئے ایران پر دباؤ بڑھانے کی کوششوں میں مصروف ہیں لیکن رات ابھی لمبی ہے اور ہم جاگ رہے ہیں، اس شھید کے قاتلوں پر بجلی بن کر ٹوٹ پڑیں گے اور اور انھیں پشیمان ہونے پر مجبور کر دیں گے۔
در ایں اثنا اسلامی جمھوریہ ایران کی اٹیمی توانائی کے ادارے کے سابق سربراہ فریدون عباسی نے کہا ہے کہ شھید فخری زادے کو امریکا میں ڈیموکریٹوں کے اقتدار میں آنے سے پہلے شھید کیا گیا کیونکہ دشمن یہ چاہتے ہیں کہ ایران پر دبا‏ؤ ڈال کر اسے مذاکرات کے لئے تیار کیا جائے۔
انھوں نے کہا کہ یہ دھشت گردانہ حملہ، مجھ پر اور شھید شہریاری پر حملے کے دس سال پورے ہونے کے موقع پر کیا گیا ہے اور آج سے 12 سال پہلے بھی شھید فخری پر حملے کے لئے دھشت گردوں کی ایک ٹیم بھیجی گئی تھی تاہم سیکورٹی اہلکاروں نے اسے ناکام بنا دیا تھا۔
فریدون عباسی نے بتایا کہ دشمن گزشتہ 15 سال سے شھید فخری کے قتل کی کوشش میں تھا۔
واضح رہے کہ اسرائیل کے وزیر اعظم نتن یاھو نے دو سال پہلے محسن فخری زادے کا نام لیا تھا جس کے بعد اسرائیلی میڈیا نے بتایا تھا کہ موساد نے بہت پہلے محسن فخری زادے کے قتل کی کوشش کی تھی تاہم وہ کوشش ناکام ہوگئی تھی۔
اسرائیل کی واللا ویب سائٹ نے بتایا تھا کہ موساد کے کچھ عہدیداروں نے بتایا ہے کہ محسن فخری زادے، ایران کے ان سائنس دانوں میں شامل ہیں جن کا نام اس کی ہٹ لسٹ میں ہے۔

Add comment