ھندوستان میں کورونا کے خلاف ٹیکہ کاری کی مہم ہفتے کے روز شروع ہو گئی ہے، جبکہ کورونا سے صحتیاب ہونے والوں کی تعداد میں مسلسل اضافہ ہو رہا ہے۔
ھندوستانی کی مرکزی وزارت صحت کے اعلان کے مطابق ملک میں کورونا کو شکست دینے والے افراد کی تعداد میں بدستور اضافہ ہو رہا ہے اور فعال معاملات کی شرح محض دو فیصد رہ گئی ہے اور مرنے والوں کی یومیہ تعداد دو سو سے بھی کم رہی۔
سرکاری اعداد و شمار کے مطابق گذشتہ چوبیس گھنٹوں کے دوران کورونا کے پندرہ ھزار ایک سو اٹھاون نئے مریض سامنے آئے جس کی وجہ سے متاثرہ افراد کی تعداد ایک کروڑ پانچ لاکھ بیالیس ھزار سے تجاوز کرگئی ۔ اسی دوران سولہ ھزار نو سو ستتر مریض صحتیاب ہو‏ئے جس کے بعد صحتیاب ہونے والوں کی تعداد ایک کروڑ ایک لاکھ اناسی ھزار سات سو پندرہ ہوگئی ۔
ھندوستان میں اس وقت کورونا کے فعال کیسز کی شرح صرف دو فیصد رہ گئی ہے ۔ ھندوستان میں گذشتہ چوبیس گھنٹے کے دوران ایک سو پچھتر مریضوں کی موت واقع ہونے سے مرنے والوں کی تعداد ایک لاکھ باون ھزار ترانوے ہوگئی ہے۔
دوسری جانب ھندوستان میں ویکسینیش مہم کا بھی آغاز کر دیا گیا ہے ۔ اطلاعات کے مطابق وزیر اعظم نریندر مودی نے آج صبح ویڈیو کانفرنسنگ کے ذریعے تمام ریاستوں اور مرکز کے زیرانتظام علاقوں کے تین ھزار چھے مراکز میں ویکسینیشن مہم کا افتتاح کیا۔ اسے دنیا میں اپنی نوعیت کی سب سے بڑی ٹیکہ کاری مہم شمار کیا جا رہا ہے۔
اس موقع پر ہندوستانی وزیر اعظم نریندر مودی نے ویکسین کی تیاری میں مصروف لوگوں کو سراہتے ہوئے کہا کہ آج وہ تمام سائنسداں تعریف کے حق دار ہیں جو مہینوں سے ویکسین بنانے میں مصروف تھے ۔
ھندوستانی وزیر اعظم نے اپنے خطاب میں عوام کو مشورہ دیتے ہوئے کہا کہ ویکسین کی ایک ڈوز کے بعد دوسری ڈوز لینا بہت ضروری ہے ۔
ھندوستان میں ویکسینیشن کے پہلے مرحلے میں تین کروڑ افراد کو ٹیکہ لگایا جا رہا ہے جبکہ دوسرے مرحلے میں اسے تیس کروڑ تک پہنچا دیا جائے گا ۔
ھندوستان نے جنوری کو دو ویکسینوں کی ہنگامی بنیادوں پر استعمال کی منظوری دی تھی جس میں ایک آکسفورڈ یونیورسٹی اور برطانیہ میں مقیم منشیات ساز آسٹرا زینیکا نے تیار کی ہے اور دوسری ھندوستانی کمپنی بھارت بائیوٹیک نے چار جنوری کو تیار کی جسے کارگو طیاروں کے ذریعے اس ملک کے مختلف علاقوں میں پہنچایا جائے گا۔

Add comment