حزب اللہ لبنان کے سیکریٹری جنرل نے استقامت کے محاذ کے شھیدوں کی شہادت کی پہلی برسی کے موقع پر تقریر میں کہا ہے کہ ایران بہت طاقتور ہے اور وہ خود یہ فیصلہ کرے گا کہ ان شھیدوں کے انتقام کب اور کیسے لینا ہے۔
سید حسن نصر اللہ نے اتوار کی رات سپاہ پاسداران انقلاب اسلامی کی قدس فورس کے سابق کمانڈر شھید جنرل قاسم سلیمانی اور عراق کی رضاکار فورس الحشد الشعبی کے ڈپٹی کمانڈر شھید ابو مہدی المہندس اور ان کے ساتھویں کی شہادت کی پہلی برسی کے خصوصی پروگرام سے خطاب کیا۔
انہوں نے کہا کہ اقوام، استقامتی تحریکوں، جماعتوں، ملتوں اور خطے کے ملکوں نے شھید سلیمانی اور شھید مہندس سے اپنی وفاداری کا اعلان کیا ہے۔
حزب اللہ لبنان کے سربراہ نے کہا کہ ایران نے لبنانی استقامت اور اس ملک کے اقتدار اعلی کی غیر مشروط حمایت کی ہے۔ ان کا کہنا تھا کہ ہم اس ملک کو جس نے پیسوں اور ہتھیاروں سے ہماری حمایت کی اور اس راہ میں شھید پیش کیے، اس ملک کے برابر نہیں سمجھ سکتے جس نے ہمارے خلاف سازشیں کیں اور صھیونی دشمن کی حمایت کی۔
نصر اللہ نے کہا کہ بعض لوگ یہ کہتے ہیں کہ ایران، انتقام لینے کے لیے اپنے دوستوں کی مدد لے گا، ایران اگر جواب دینا چاہے گا تو وہ فوجی یا سیکورٹی جواب دے گا، ایران کمزور نہیں بلکہ مضبوط ہے اور وہی فیصلہ کرے گا کہ کس طرح اور کب جواب دے۔
سید حسن نصر اللہ نے کہا کہ ایران مضبوط ہے اور جب وہ شھید سلیمانی کے قتل کا جواب دینے کا فیصلہ کر لے گا تو وہ خود عمل کرے گا اور اپنے دوستوں سے نہیں کہے گا کہ وہ شھید قاسم سلیمانی کے قتل کا جواب دیں۔

Add comment