عراق کے صدر نے دھشتگردی کے خلاف سپاہ قدس کے کمانڈر شھید قاسم سلیمانی اور ملک کی رضاکارفورس الحشد الشعبی کے ڈپٹی کمانڈر کی جانفشانیوں کی قدردانی کی۔
فارس نیوز کے مطابق جنرل سلیمانی، جنرل ابو مہدی المہندس اور ان کے ساتھیوں کی شہادت کی پہلی برسی کے ایک پروگرام میں عراق کے صدر برہم صالح نے کہا کہ شھید جنرل سلیمانی نے نہایت دشوار اور سخت حالات میں دھشتگرد ٹولے داعش کے خلاف جنگ میں عراقی عوام کا ساتھ دیا اور شھید سلیمانی اور ابو مہدی المہندس عرصۂ دراز تک دھشتگردی کے خلاف بر سر پیکار رہے اور دھشتگردوں بالخصوص داعش کے خلاف موثر کارروائیاں کیں۔
شھید جنرل قاسم سلیمانی، شھید ابو مہدی المہندس اور ان کے ساتھیوں کی شہادت کی پہلی برسی پر عراق کی رضاکار فورس الحشد الشعبی کی جانب سے ایک پروگرام کا انعقاد کیا گیا جس میں عراق کے متعدد وزرا اور سول و فوجی عہدیداروں نے شرکت کی۔
ایران کی قدس فورس کے کمانڈر جنرل قاسم سلیمانی، عراق کی رضاکار فورس الحشد الشعبی کے ڈپٹی کمانڈر جنرل ابو مہدی المہندس اور ان کے ساتھیوں کو امریکی دہشتگردوں نے گزشتہ برس تین جنوری کو بغداد ایر پورٹ کے قریب شھید کر دیا تھا۔ اس دھشتگردانہ واقعے کے بعد امریکی وزارت جنگ پینٹاگون نے اعتراف کیا تھا کہ اس حملے کا حکم براہ راست صدر ڈونلڈ ٹرمپ نے دیا تھا۔
امریکہ کے اس دھشتگردانہ اقدام کی عالمی سطح پر سخت مذمت کی گئی اور اسے ریاستی دھشتگردی قرار دیا گیا۔

Add comment