جہاد اسلامی فلسطین کے سربراہ نے کہا ہے کہ آج غزہ کی طاقت، استقامتی محاذ کے عظیم کمانڈر شھید جنرل قاسم سلیمانی کی جدوجہد اور کاوشوں کا نتیجہ ہے۔
المیادین ٹی وی کی رپورٹ کے مطابق تحریک جہاد اسلامی فلسطین کے سربراہ زیاد نخالہ نے فلسطینی استقامت کی مدد کے سلسلے میں قدس بریگیڈ کے کمانڈر شھید جنرل قاسم سلیمانی کے کردار کو قابل تعریف قرار دیتے ہوئے کہا کہ غزہ میں ستون محکم نامی حالیہ فوجی مشقوں نے ثابت کردیا کہ فلسطینی عوام اس وقت ہمیشہ سے زیادہ مضبوط ہیں۔
زیادہ نخالہ نے صھیونی حکومت کے ساتھ بعض عرب حکام کی سازباز پر تنقید کرتے ہوئے کہا کہ ان ممالک نے ثابت کردیا کہ وہ کبھی بھی فلسطین کے ساتھ نہیں تھے اور آج بھی صھیونی دشمن کی اصلی ماہیت کو نہیں پہچانتے۔
جہاد اسلامی فلسطین کے سربراہ نے میزائل اور انواع و اقسام کے ہتھیار بنانے میں استقامت کی کامیابی کا ذکرکرتے ہوئے کہا کہ چونکہ امریکہ کی مداخلت اور صھیونی حکومت کے دشمنانہ اقدامات کی وجہ سے علاقہ حساس حالات سے دوچار ہے ، اس لئے فلسطینی استقامتی محاذ خود کو دشمن کے ساتھ ہر طرح کی ممکنہ جنگ کے لئے تیار کئے ہوئے ہے۔
غزہ میں پہلی بار تیس دسمبر دوھزار بیس کو فلسطین کے بارہ گروہوں کی مشترکہ فوجی مشقوں کا انعقاد کیا گیا۔ ان فوجی مشقوں کا عنوان رکن الشدید یعنی ستون محکم تھا۔
دوسری جانب فلسطینی انتظامیہ کے سربراہ محمود عباس نے زور دے کر کہا ہے کہ ملت فلسطین ، ہرگز صھیونی حکومت کے جارحانہ اقدامات کے سامنے گھٹنے نہیں ٹیکے گی۔
الجزیرہ ٹی وی کی رپورٹ کے مطابق محدود اختیارات کی حامل فلسطینی انتظامیہ کے صدر محمود عباس نے تحریک انتفاضہ کی سالگرہ کے موقع پر اپنے ایک خطاب میں کہا کہ ملت فلسطین نے بہت سے مسائل و مشکلات کو برداشت کیا ہے اور اب بھی صھیونی حکومت کے دشمنانہ اقدامات اور بیت المقدس کا تشخص تبدیل کرنے کے لئے ان کی مذموم سازشوں کا سامنا کررہی ہے ۔
محمود عباس نے کہا کہ فلسطینی انتظامیہ داخلی محاذ کو مضبوط بنانے کے لئے قومی مفاہمت، انتخابات کے انعقاد اور غاصب صھیونی حکومت کی جیلوں سے تمام فلسطینیوں کو آزاد کرانے کی کوشش جاری رکھے گی۔

Add comment