فلسطینی گروھوں نے غاصب صھیونی حکومت کے جرائم اور وحشیانہ جارحیتوں کے تسلسل کو اسرائیل کے ساتھ بعض عرب حکومتوں کے سازشی منصوبوں کی ناکامی قرار دیا ہے۔
فلسطین کی تحریک جہاد اسلامی نے صھیونی فوجیوں کے ہاتھوں فلسطینی بچے کی شہادت پر کہا کہ اس طرح کے اقدامات کا مقابلہ کرنے کے لئے استقامت کے تمام طریقوں کو اپنایا جائے گا۔
عوامی محاذ برائے آزادی فلسطین نے بھی ایک بیان جاری کر کے اعلان کیا ہے کہ فلسطینی بچے کا قتل اور الجثمانیہ چرچ کو آگ لگانے کا انتہا پسند صھیونیوں کا اقدام ، سرزمین فلسطین کے مزید حصوں کو مقبوضہ فلسطین میں شامل کرنے، اسے صھیونی رنگ دینے اور غاصبانہ قبضے کو استحکام بخشنے کے تناظر میں انجام پایا ہے۔
فلسطینی ذرائع ابلاغ نے رپورٹ دی ہے کہ صھیونی دھشتگردوں نے جمعے اور ہفتے کی درمیانی رات کو علی ابو علیا نامی فلسطنی بچے کو گولی مار کر شھید کردیا ۔
دوسری جانب مقبوضہ بیت المقدس کے مقامی ذرائع نے بھی اعلان کیا کہ ایک انتہا پسند صھیونی جو جبل زیتون کے قریب واقع الجثمانیہ چرچ کو نذرآتش کرنا چاہتا تھا، مسلمانوں کے بروقت اقدام کے نتیجے میں اپنے مذموم عزائم میں ناکام ہوگیا۔
صھیونیوں نے گزشتہ برسوں کے دوران مقبوضہ بیت المقدس اور غرب اردن میں عیسائیوں اور مسلمانوں کے مقدس مقامات کو بارہا اپنے حملوں کا نشانہ بنایا ہے۔
درایں اثنا محدود خودمختار فلسطینی انتظامیہ کی وزارت خارجہ نے عالمی برادری سے مطالبہ کیا ہے کہ وہ دھشتگرد صھیونیوں کو مقدس مقامات کی توہین سے باز رکھنے کے لئے کوئی عملی اقدام انجام دے۔
فلسطینی انتظامیہ کی وزارت خارجہ نے مقبوضہ بیت المقدس کے الجثمانیہ چرچ کو نذرآتش کرنے کے تعلق سے ایک انتہا پسند صھیونی کے اقدام پر ردعمل ظاہر کرتے ہوئے اعلان کیا ہے کہ یہ اقدام غاصب صھیونی حکومت کی حمایت سے انجام پایا ہے کیونکہ اس طرح کے جرائم مختلف مقامات اور مختلف شکلوں میں بار بار انجام پا چکے ہیں۔
فلسطینی انتظامیہ کی وزارت خارجہ نے کہا ہے کہ چرچ کو آگ لگانے کے اس تازہ اقدام سے ماضی میں صھیونیوں کے ہاتھوں اسلام اور عیسائیت کے مقدس مقامات کو متعدد بار نذرآتش کرنے کی کوششوں کی یاد تازہ ہو جاتی ہے اور عالمی برادری کو چاہئے کہ وہ صھیونی دھشتگردوں کو بین الاقوامی دھشتگردوں کی فہرست میں شامل کرے۔

Add comment