اسلامی جمھوریہ ایران کے وزیر خارجہ محمد جواد ظریف نے ٹوئیٹ کرتے ہوئے لکھا ہے کہ بلا شک ایران کے ایک اعلی سائنسدان پر دھشتگردانہ حملے کی منصوبہ بندی ایک دھشتگرد حکومت کے توسط سے کی گئی اور اس پرعمل در آمد اس کا ساتھ دینے والے دھشتگردوں نے کیا۔
ایران کے وزیر خارجہ نے کہا کہ یہ شرم کی بات ہے کہ بعض لوگ دھشت گردی کے خلاف کھڑے ہونے کے بجائے صبر و تحمل سے کام لینے کے بیانات دینے پر اکتفا کرتے ہیں۔
اس سے قبل ایران کے وزیر خارجہ محمد جواد ظریف نے ایک ٹوئیٹ میں شھید فخری زادہ کے قتل کی ذمہ داری غاصب صھیونی حکومت پرعائد کرتے ہوئے لکھا تھا کہ شھید فخری زادہ کے قتل میں ناجائز صھیونی حکومت کے ملوث ہونے کے ٹھوس شواہد موجود ہیں۔
واضح رہے کہ 27 نومبر کو ایران کے دارالحکومت تہران کے قریب مسلح افراد نے ایران کے ایٹمی پروگرام کے بانی سائنسدان محسن فخری زادہ کی گاڑی کے قریب دھماکہ اور فائرنگ کی جس کے نتیجے میں سائنس دان محسن فخری زادہ شدید زخمی ہوگئے، اُنھیں قریبی اسپتال منتقل کیا گیا تاہم وہ جانبر نہ ہوسکے۔

Add comment