شھر مقدس قم ایران میں 25 نومبر سہ پہر کو مجلس علماء ھند شعبہ قم کے دفتر میں معمار قوم حکیم امت ڈاکٹر کلب صادق صاحب طاب ثراہ کی رحلت کی مناسبت سے تعزیتی جلسہ کا انعقاد کیا گیا.
تعزیتی جلسہ کا آغاز تلاوت کلام اللہ مجید سے ہوا آغاز کلام میں مجلس علماء ھند شعبہ قم کے صدر جناب مولانا سید احمد رضا زرارہ نے آپ کی تابناک اور مجاھدانہ زندگی پر روشنی ڈالتے ہوئے کہا کہ آپ کی رحلت سے پوری انسانیت کو نقصان ہوا ہے اور امت اسلامی کو ایک مرتبہ پھر یتیمی کا احساس ہو رہا ہے۔
اس تعزیتی جلسہ میں مختلف علمائے کرام نے اپنے تاثر کا اظہار خیال کیا جس میں حجۃ الاسلام مولانا سید مراد رضا رضوی صاحب نے کہا کہ آپ اتحاد کے بہت بڑے حامی تھے اور عظیم اھداف کے تحت کام کررہے تھے۔
مولانا حجۃ الاسلام مولانا سید رضا حیدرزیدی صاحب نے کہا کہ آپ قرآن کی آیت ادع الی سبیل ربک بالحکمۃ والموعظۃ الحسنہ کے عملی مصداق تھے اور ابتدائی زندگی سے ہی قوم کیلئے کچھ کر گزرنے کا حوصلہ لےکر میدان عمل میں سرگرم رہے اور آخری سانس تک پورے وجود کے ساتھ قوم کی فلاح و بہبود کیلئے کوشاں رہے
آخر میں حجۃ الاسلام مولانا سید احتشام عباس زیدی صاحب نے موصوف کے تحریک علم کے سلسلے میں گفتگو کرتے ہوئے فرمایا کہ آپ نے تمام دینی تحریک کا بھر پور ساتھ دیا آپ اتحاد بین المومنین ومسلمین اور اتحاد بین الادیان کے علمبردار تھے اورمومنین سے درخواست کی ان کے مشن کو ہم مل کر آگے بڑھائیں آخرمیں موصوف نے مصائب سید الشهدا پر اپنا بیان ختم کیا ۔
اس تعزیتی جلسے میں مختلف ادارے کے ذمہ داران نے بھی شرکت فرمائی اور مرحوم کے علو درجات اور مغفرت کی دعا کے ساتھ مرحوم کی روح کی خوشنودی کے لئے سورہ فاتحہ کی تلاوت فرمائی۔

Add comment