شام کے شہر ادلب کے نواحی علاقے میں دھشتگردوں کے ہتھیاروں کے گودام میں ہونے والے دھماکے میں متعدد دھشتگرد ہلاک ہو گئے ہیں۔
اسپوتنک کی رپورٹ کے مطابق شام کے شہر ادلب کے نواحی علاقے سلقین میں تحریر الشام ( جبهه النصره) کے دہشتگردوں کے ہتھیاروں کے گودام میں ہونے والے دھماکے میں کم سے کم 10 دھشتگرد ہلاک اور متعدد زخمی ہو گئے ہیں۔
آگاہ ذرائع کا کہنا ہے کہ ہونے والے دھماکے کے نتیجے میں 2 بچوں سمیت 6 شامی شہری بھی زخمی ہوئے۔
صوبہ ادلب کے ایک بڑے حصے پر دھشتگردوں کا قبضہ ہے ۔ شامی فوج نے تاکید کے ساتھ اعلان کیا ہے کہ وہ اس صوبے کو بھی دھشتگردوں سے پاک کر کے دم لے گی۔
ترکی شام میں دھشت گرد گروہوں کا ایک اصلی حامی شمار ہوتا ہے- ترکی کی فوج نے ادلب میں پچھلے ہفتوں کے دوران دھشت گردوں کی حمایت میں شامی فوج کے ٹھکانوں اور اس کی تنصیبات پر کئی بار حملے کئے تھے - اس وقت بھی صوبہ ادلب کے بعض علاقوں پر ترک فوج نے قبضہ کر رکھا ہے۔
گزشتہ تین برسوں کے دوران ترکی نے بارہا شام میں جارحیت کا ارتکاب کیا ہے- اس درمیان شام کے اندر ترک فوج کی کارروائیوں کی عالمی سطح پر مذمت کی جارہی ہے۔
یاد رہے کہ شامی افواج گزشتہ نو سال سے امریکا ، یورپ اور چند علاقائی حکومتوں کے حمایت یافتہ دھشت گردوں کے خلاف نبرد آزما ہیں۔
شامی افواج نے اسلامی جمھوریہ ایران کی فوجی مشاورت کے علاوہ روس اور استقامتی محاذ کے تعاون سے داعش کو مکمل شکست دے کر اپنے سبھی علاقے اس خطرناک دھشت گرد گروہ کے قبضے سے آزاد کرا لئے اور اس وقت شام میں کوئی علاقہ داعش کے قبضے میں نہیں ہے-

Add comment